ලොව පුරා දැඩි ආන්දෝලනයකට තුඩු දී ඇති ඇමෙරිකානු ජාතික ජෙෆ්රි එප්ස්ටීන්ගේ (Jeffrey Epstein) රහස් ලේඛනාවලිය තුළ ශ්රී ලංකාව පිළිබඳව 188 වතාවක් සටහන් වී ඇති බව අනාවරණය වී තිබේ. කෙසේ වෙතත්, එම කිසිදු සටහනක ශ්රී ලංකාවට අදාළව කිසිදු වැරදි ක්රියාවක්, අපරාධයක් හෝ නීති විරෝධී මෙහෙයුමක් පිළිබඳව සඳහන් නොවන බව එක්සත් ජනපද අධිකරණ දෙපාර්තමේන්තුව නිකුත් කළ තොරතුරු මගින් තහවුරු වී ඇත.
ලිංගික අපරාධකරුවෙකු ලෙස වරදකරු වී සිටියදී මියගිය එප්ස්ටීන්ට අයත් මෙම ලේඛන අතර ලෝකයේ විවිධ රටවල ප්රකට පුද්ගලයන්ගේ නම් සහ රහස් තොරතුරු ඇතුළත් ගොනු මිලියන ගණනක් පවතී. ශ්රී ලංකාව පිළිබඳව එහි වාර 188ක් සඳහන් වී තිබුණද, එම සඳහන් කිරීම් හුදෙක් ඊමේල් පණිවිඩ, සංචාරක සැලසුම් පිළිබඳ සන්නිවේදනයන් සහ පුද්ගලයන් ශ්රී ලංකාවට පැමිණ සිටීම වැනි සාමාන්ය කරුණු සම්බන්ධ අතුරු සංවාදවලට පමණක් සීමා වී ඇත.
ඒ අනුව, එප්ස්ටීන්ගේ අපරාධ ජාලය සමඟ ශ්රී ලංකාවේ කිසිදු සම්බන්ධයක් නොමැති බවත්, කිසිදු ශ්රී ලාංකිකයෙකු වැරදි ක්රියාවලට සම්බන්ධ බවට එහි දක්වා නොමැති බවත් පැහැදිලි වේ. එමෙන්ම ශ්රී ලංකාව එවැනි නීති විරෝධී ක්රියාකාරකම් සඳහා භාවිත කළ ස්ථානයක් ලෙස ද එම ලේඛනවල සඳහන් නොවේ. විවිධ මට්ටමේ සංස්කරණයන්ට භාජනය වූ මෙම ලේඛන මහජන ප්රදර්ශනය සඳහා එක්සත් ජනපද අධිකරණ දෙපාර්තමේන්තුවේ වෙබ් අඩවියේ ප්රසිද්ධ කර තිබේ.
