හම්බන්තොට ජාත්‍යන්තර වරාය පරිශ්‍රයේ පිහිටි මෙට්‍රික් ටොන් 30,000ක ධාරිතාවයෙන් යුත් ද්‍රව පෙට්‍රෝලියම් ගෑස් (LPG) පර්යන්තයේ හිමිකාරිත්වය සහ මෙහෙයුම් කටයුතු හොබවන ‘ලෝෆ්ස් ටර්මිනල්ස් ලිමිටඩ්’ (LAUGFS Terminals Limited) සමාගමේ අනාගත උපායමාර්ගික විකල්පයන් සම්බන්ධයෙන් මූලික සහ අප්‍රකාශිත සාකච්ඡා ආරම්භ කර ඇති බව ලෝෆ්ස් ගෑස් පීඑල්සී (LAUGFS Gas PLC) සමාගම සිය කොටස් හිමියන්ට සහ කොළඹ කොටස් වෙළඳපොළ වෙත නිල වශයෙන් දැනුම් දී ඇත.
කොළඹ කොටස් වෙළඳපොළ වෙත සඳුදා (26) දින යොමු කරන ලද ආයතනික අනාවරණය කිරීමේ නිවේදනයකට අනුව, අදාළ පර්යන්තයේ අයිතිය හිමි ලෝෆ්ස් ගෑස් පීඑල්සී සමාගම, මේ සඳහා උනන්දුවක් දක්වන විවිධ පාර්ශ්වයන් සමඟ මූලික මට්ටමේ සාකච්ඡා පවත්වමින් සිටින බව තහවුරු කර තිබේ.
මෙම සාකච්ඡා යටතේ මේ වන විට ඇගයීමට ලක්වෙමින් පවතින උපායමාර්ගික විකල්පයන් කිහිපයක් වෙයි:
- වෙනත් සමාගම් සමඟ වාණිජමය සහයෝගීතාවයන් වෙත එළඹීම.
- බාහිර ආයෝජකයන් මඟින් අලුතින් ආයෝජන ලබාගැනීම.
- ලෝෆ්ස් ටර්මිනල්ස් ලිමිටඩ් සමාගම සතුව පවතින ලෝෆ්ස් ගෑස් පීඑල්සී සමාගමේ කොටස් හිමිකාරිත්වයෙන් කොටසක් හෝ සම්පූර්ණ කොටස් හිමිකාරිත්වයම විකිණීම (Disposal of shareholding).
කෙසේ වෙතත්, ඉදිරිපත් විය හැකි යෝජිත ගනුදෙනුවල ව්‍යුහය හෝ කොන්දේසි සම්බන්ධයෙන් මෙතෙක් කිසිදු පාර්ශ්වයක් සමඟ අවසානාත්මක එකඟතාවකට පැමිණ නොමැති අතර, ඒ සම්බන්ධයෙන් කිසිදු නිශ්චිත ගිවිසුමකට එළඹ නොමැති බව ද සමාගම පෙන්වා දෙයි.
මෙම මූලික සාකච්ඡා මඟින් අවසානාත්මක ගනුදෙනුවක් සිදු වන බවට මෙතෙක් සහතිකයක් ලබාදිය නොහැකි බැවින්, එමඟින් සමාගමට සිදුවන මුල්‍යමය බලපෑම (Financial Impact) පිළිබඳව මෙතෙක් නිශ්චිතව තීරණය කළ නොහැකි බව ද ලෝෆ්ස් ගෑස් පීඑල්සී සමාගම සඳහන් කරයි.
කොළඹ කොටස් වෙළඳපොළේ ලැයිස්තුගත කිරීමේ රීතීන්ට අනුකූලව, මෙම සාකච්ඡාවලට අදාළව ඉදිරියේදී සිදුවන සියලුම වැදගත් වර්ධනයන් පිළිබඳව නියමිත පරිදි කොටස් වෙළඳපොළ වෙත අනාවරණය කිරීමට කටයුතු කරන බව ද සමාගම වැඩිදුරටත් කියා සිටියි.
