‘ලූනි ටියුන්ස්’ (Looney Tunes) සිනමා සහ කාටූන් මාලාවේ බග්ස් බනී (Bugs Bunny), ඩැෆී ඩක් (Daffy Duck) සහ පෝකි පිග් (Porky Pig) ඇතුළු ජනප්‍රිය චරිත රැසකට හඬ කැවූ එමී (Emmy) සම්මානනීය කැනේඩියානු හඬ නළු එරික් බවුසා (Eric Bauza) මහතා හදිසියේ අභාවප්‍රාප්ත වී ඇත. මියයන විට ඒ මහතා 46 වැනි වියෙහි පසුවිය.
ඔහුගේ අභාවය පිළිබඳ පුවත ඉන්ස්ටග්‍රෑම් (Instagram) ගිණුම හරහා තහවුරු කරමින් ඔහුගේ පවුලේ පිරිස සඳහන් කළේ ඔහු හදිසියේම ජීවිතක්ෂයට පත්වූ බවයි. අධිරුධිර පීඩනය ආශ්‍රිත හෘදයාබාධයක් (hypertensive cardiovascular disease) හේතුවෙන් ඉරිදා (ඔක්තෝබර් 25) දින ඒ මහතා සිය නිවසේදී අභාවප්‍රාප්ත වූ බව ලොස් ඇන්ජලීස් වෛද්‍ය වාර්තා පදනම් කරගනිමින් විදෙස් මාධ්‍ය වාර්තා කර සිටියි.
ඔන්ටේරියෝ හි උපත ලැබූ ෆිලිපීන සම්භවයක් සහිත බවුසා, කුඩා කල සිටම ලූනි ටියුන්ස් චරිතවලට දැඩි ලෙස ඇලුම් කළ අතර එම හඬවල් අනුකරණය කිරීමට පුරුදුව සිටියේය. 2021 වසරේ පැවැති සම්මුඛ සාකච්ඡාවකදී ඔහු සඳහන් කළේ, “ලූනි ටියුන්ස් යනු සියලු භාෂා සහ සංස්කෘතීන් ඉක්මවා යන නිර්මාණයක්” බවයි.
ඔහු ‘Space Jam: A New Legacy’ (2021) සහ ‘Coyote vs. Acme’ සිනමාපටවල ඩැෆී ඩක්, පෝකි පිග්, එල්මර් ෆඩ් සහ ෆොගෝන් ලෙගෝන් යන චරිත සඳහා හඬ මුසු කළේය. මීට අමතරව ‘The Super Mario Bros. Movie’ (2023) සහ එහි දෙවන කොටස වන ‘The Super Mario Galaxy Movie’ හි ‘ටෝඩ් ජෙනරල්’ (Toad General) චරිතයට ද ඔහු හඬ දැක්වීය. 2022 සහ 2025 අතර කාලයේදී රූපවාහිනී කාටූන් මාලාවන් සඳහා දක්වන ලද විශිෂ්ට හඬ රංගනය වෙනුවෙන් ඔහු එමී සම්මාන 3කින් පිදුම් ලැබීය.
වෝනර් බ්‍රදර්ස් ටෙලිවිෂන් ගෲප් හි සභාපති චැනින් ඩන්ගි (Channing Dungey) මහතා සිය ශෝකය පළ කරමින් සඳහන් කළේ, එරික් බවුසා යනු ලොව පුරා මිලියන සංඛ්‍යාත ජනතාවකට සිනහව සහ ප්‍රීතිය ගෙන දුන් සුවිශේෂී හඬ නළුවෙකු බවයි. මෙල් බ්ලැන්ක් (Mel Blanc) වැනි දැවැන්තයන් ගිය මග යමින් ලූනි ටියුන්ස් උරුමය ඉදිරියට ගෙන යාමට ලැබීම සිය ජීවිතයේ ලැබූ විශාලතම ගෞරවයක් ලෙස බවුසා සැලකූ බව ද ඔහු වැඩිදුරටත් මතක් කර සිටියේය.
