ලොව පුරා දැඩි අවධානයක් දිනාගත් චීනයේ DeepSeek සමාගමේ කෘත්‍රිම බුද්ධි (AI) තාක්ෂණය සහ එම ආකෘති ඇසුරෙන් නිපදවන ලද සියලු මෘදුකාංග පද්ධති, ඇමෙරිකානු රජයේ බහුතර ආයතනවලින් වහාම ඉවත් කරන ලෙස එරට ස්වදේශ ආරක්ෂක දෙපාර්තමේන්තුව නියෝග කර තිබේ.
මෙම තහනම ඇමෙරිකා එක්සත් ජනපදයේ භාණ්ඩාගාර දෙපාර්තමේන්තුව, රාජ්‍ය දෙපාර්තමේන්තුව සහ අධිකරණ දෙපාර්තමේන්තුව ඇතුළු සමස්ත සිවිල් රාජ්‍ය ආයතන ජාලය පුරාම බලාත්මක වන අතර, ආරක්ෂක දෙපාර්තමේන්තුව (Pentagon) පමණක් මීට ඇතුළත් කර නොමැත. මෙම තීරණය පසුගිය ජූලි මස අග භාගයේ සිටම රහසිගතව ක්‍රියාත්මක කර තිබූ අතර, ස්වදේශ ආරක්ෂක දෙපාර්තමේන්තුව විසින් ඒ පිළිබඳ නිල නිවේදනය පසුගිය සඳුදා ප්‍රසිද්ධියට පත් කරනු ලැබීය.
විවෘත මූලාශ්‍ර (open-source) තාක්ෂණයක් ලෙස නොමිලේ සහ ඉතා අඩු පිරිවැයකින් භාවිත කළ හැකි ඩීප්සීක් කෘත්‍රිම බුද්ධි මාදිලිය, ගෝලීය AI තාක්ෂණික තරගය තුළ ප්‍රබල සංසිද්ධියක් බවට පත්ව ඇත. Google හි ‘Gemini’, Anthropic ආයතනයේ ‘Claude’ හෝ OpenAI ආයතනයේ ‘Codex’ වැනි සංවෘත (closed models) සඳහා වැයවන අතිවිශාල පිරිවැයෙන් සුළු ප්‍රතිශතයකින් ඩීප්සීක් තාක්ෂණය භාවිත කිරීමට මෘදුකාංග සංවර්ධකයන්ට හැකියාව ලැබීම මෙයට ප්‍රධාන හේතුවයි.
OpenAI සමාගම සිය ප්‍රමුඛ ‘GPT-4’ මාදිලිය නිර්මාණය කිරීම සඳහා ඇමෙරිකානු ඩොලර් මිලියන 100 කට ආසන්න මුදලක් වැය කරද්දී, ඩීප්සීක් සමාගම සිය මූලික මාදිලිය නිර්මාණය කර ඇත්තේ ඩොලර් මිලියන 6 ක් වැනි සුළු මුදලකිනි. පසුගිය සතියේ නිකුත් කෙරුණු එහි නවතම සංස්කරණය මගින් පරිගණක කේත ලිවීම (coding) වැනි සංකීර්ණ කාර්යයන්හිදී OpenAI හි දියුණුම මෙවලම් පවා අභිබවා යාමට සමත්ව ඇති බව පරිශීලකයෝ පෙන්වා දෙති.
මෙම තහනම ක්‍රියාත්මක වන්නේ ඩොනල්ඩ් ට්‍රම්ප්ගේ පරිපාලනය සහ ප්‍රමුඛ පෙළේ ඇමෙරිකානු තාක්ෂණික සමාගම් චීන AI තාක්ෂණය දැඩි ලෙස විවේචනය කරමින් සිටින පසුබිමකය. කෘත්‍රිම බුද්ධි ක්ෂේත්‍රයේ ප්‍රමුඛතාව අත්පත් කරගැනීමේදී චීනය ඇමෙරිකාවේ ප්‍රධානතම ප්‍රතිවාදියා බව ජනාධිපති ට්‍රම්ප් ප්‍රකාශ කර තිබේ. ධවල මන්දිරයේ තාක්ෂණික ප්‍රධානී මයිකල් ක්‍රැට්සියෝස් (Michael Kratsios) අභ්‍යන්තර සංදේශයක් මගින් අනතුරු අඟවා ඇත්තේ, ඇමෙරිකානු AI තාක්ෂණය චීන සමාගම් විසින් අනිසි ලෙස හා කූට ලෙස ප්‍රයෝජනයට ගන්නා බවයි. ඉදිරි මාසවලදී කොටස් වෙළෙඳපොළට පිවිසීමට සූදානම් වන ‘Anthropic’ සහ ‘OpenAI’ යන දැවැන්ත ඇමෙරිකානු සමාගම් චෝදනා කරන්නේ, ඩීප්සීක් ඇතුළු චීන සමාගම් සිය මූලික තාක්ෂණික ආකෘතීන් සොරකම් කර පිටපත් කර ඇති බවයි.
කෙසේ වෙතත්, ඇපල් ‘App Store’ හි වැඩිම පිරිසක් බාගත කරගත් යෙදුම් අතර පෙරමුණේ පසුවන ඩීප්සීක් තාක්ෂණය, Snowflake, Vercel සහ OpenRouter වැනි ඇමෙරිකානු ප්‍රකට සමාගම් ගණනාවක් විසින්ද මේ වන විටත් සිය පාරිභෝගික සේවාවන් සඳහා යොදාගනිමින් සිටී.
