විපක්ෂ මන්ත්‍රීවරුන් මිනිසුන් අතර පවතින උතුම් මානව සබඳතා පිළිබඳව අවබෝධයක් නොමැති පිරිසක් බව ආණ්ඩු පක්ෂ පාර්ලිමේන්තු මන්ත්‍රිනී දීප්ති වාසලගේ මහත්මිය පාර්ලිමේන්තුවේදී ප්‍රකාශ කළාය. විපක්ෂයේ ඇතැම් මන්ත්‍රීවරුන් විසින් මෑතකදී සිදු කරන ලද ප්‍රකාශ කිහිපයක් විවේචනය කරමින් ඇය මේ බව සඳහන් කළාය.
මිනිසුන් දෙදෙනෙකු අතර පවතින සම්බන්ධතාවක් දෙස විපක්ෂය බලන්නේ හුදෙක් කායික සබඳතාවක් ලෙස පමණක් බවත්, ඔවුන්ගේ දේශපාලන භාවිතය එවැනි මට්ටමක පවතින බවත් ඇය චෝදනා කළාය. විපක්ෂයට හැකි වී ඇත්තේ සභ්‍යත්වයට පටහැනි අදහස් දැක්වීමට පමණක් බවත්, එවැනි පහත් ප්‍රකාශ තමන් දැඩි ලෙස හෙළා දකින බවත් මන්ත්‍රිනීවරිය අවධාරණය කළාය.
පාර්ලිමේන්තු සභා ගර්භය තුළ මන්ත්‍රීවරුන්ගේ හැසිරීම සහ භාෂා භාවිතය පිළිබඳව මතු වී ඇති මෙම විවාදාත්මක තත්ත්වය තුළ, සභාවේ ගෞරවය ආරක්ෂා කර ගැනීම සියලු දෙනාගේ වගකීමක් බව ද ඇය වැඩිදුරටත් කියා සිටියාය.
