රජය තමන්ට දුන් පොරොන්දු මෙවර අය – වැයෙන් ඉටු නොකළහොත් සියලු විදුහල්පතිවරුන් අය – වැය තෙවැනි වර කියවීම අවසන් වීමට පෙර කොළඹට පැමිණ විරෝධතාවක නිරතවන බව විදුහල්පති ශ්‍රේණි නිලධාරීන්ගේ සංගමය අනතුරු අඟවයි.
අවුරුදු 27 ක සිට තිබෙන වැටුප් විෂමතාව තවමත් එලෙසම බව එම සංගමයේ ප්‍රධාන ලේකම් නිමල් මුදුන්කොටුව මහතා මාධ්‍ය හමුවකදී පැවැසීය.
තවදුරටත් කතා කළ ඒ මහතා මෙසේද කියා සිටියේය.
” අවුරුදු 27ක් තිස්සේ ගුරුවරුන්ට විදුහල්පතිවරුන්ට තිබුණු වැටුප් විෂමතාව තවත් වැඩි වීමක් මේ අය-වැය හරහා සිද්ධ වෙලා. ඒ නිසා විදුහල්පති දීමනාව වැඩි කරන්න, වැටුප් වර්ධන සම්බන්ධ ගැටලු සියල්ල විසඳන්න, දුරකථන දීමනාව ඇතුළු අනෙකුත් දීමනා මේ අය-වැයෙන් ලබා දෙන්න. මෙන්න මේ ඉල්ලීම් මුල් කරගෙන ලංකාවේ සියලු ශ්‍රේණිධාරි විදුහල්පතිවරුන් අය-වැය අවසානයට පෙර කොළඹට කැඳවන්න විධායක සභාව තීන්දු කරලා තිබෙනවා.”
