රජය සියලු අසාර්ථකත්වයන් සඳහා නිරන්තරයෙන් විපක්ෂයට දොස් පැවරීමට උත්සාහ කරන බවත්, නිසි සැලසුමකින් තොරව ලබා දුන් පොරොන්දු ඉටු කිරීමට නොහැකි වීම නිසා මහජනතාව දැඩි කලකිරීමකට පත්ව ඇති බවත් ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා පවසයි. මහනුවර ශ්රී දළදා සමිඳුන් වැඳපුදා ගැනීමෙන් අනතුරුව මාධ්ය වෙත අදහස් දක්වමින් මන්ත්රීවරයා සඳහන් කළේ, ජනාධිපතිවරයා තත්ත්වය නිසි ලෙස තක්සේරු කිරීමකින් තොරව හෝ අදාළ නිලධාරීන්ගෙන් උපදෙස් ලබා නොගෙන පීඩාවට පත් ජනතාව මුලා කිරීමට විවිධ පොරොන්දු ලබා දී ඇති බවයි.
නිවසක් අහිමි වූ පුද්ගලයෙකුට රුපියල් මිලියන 5ක වන්දි මුදලක් සහ වහලයේ තහඩුවක් හානි වූ අයෙකුට පවා රුපියල් ලක්ෂ 10ක් ලබා දෙන බවට ජනාධිපතිවරයා මුලින් පොරොන්දු වුවද, දැන් එම මුදල රුපියල් ලක්ෂ 5 දක්වා අඩු කර ඇති බව මන්ත්රීවරයා මෙහිදී චෝදනා කළේය. රජය බොරු පොරොන්දු දෙමින් ජනතාවගේ බලාපොරොත්තු සුන් කරන බව පෙන්වා දුන් ඔහු, ඕනෑම පොරොන්දුවක් ලබා දිය යුත්තේ නිවැරදි තොරතුරු සහ අදාළ බලධාරීන් සමඟ සාකච්ඡා කිරීමෙන් අනතුරුව බව අවධාරණය කළේය. එසේ නොමැතිව මහජන පීඩනය තාවකාලිකව සමනය කිරීම සඳහා පදනම් විරහිත ප්රකාශ නිකුත් කිරීම අනුමත කළ නොහැකි බව හෙතෙම වැඩිදුරටත් කියා සිටියේය.
රජයේ ඉදිරි ගමන පිළිබඳව අදහස් දක්වමින් මන්ත්රීවරයා කියා සිටියේ, ශ්රී ලංකා පොදුජන පෙරමුණ රජය පෙරළා දැමීමට කටයුතු නොකරන බවයි. “අපි මේ රජය පෙරළා දමන්න අවශ්ය නැහැ. ඔවුන් ක්රියා කරන ආකාරය අනුව මේ රජය තනිවම ඇද වැටෙනු ඇති” යනුවෙන් පවසමින් ඔහු ප්රකාශ කළේ රජය තමන්ගේම ක්රියාකලාපය නිසා අර්බුදයකට ලක්වන බවයි.
