ජාත්‍යන්තර මූල්‍ය අරමුදලේ නියෝජිතයන් පිරිසක් ලබන සතියේ දිවයිනට පැමිණීමට නියමිත බව අධිකරණ හා බන්ධනාගාර ප්‍රතිසංස්කරණ අමාත්‍ය ජනාධිපති නීතිඥ ආචාර්ය විජේදාස රාජපක්ෂ මහතා පවසයි.
ජාත්‍යන්තර මූල්‍ය අරමුදලේ නියෝජිතයන් ලබන වසරේ පලමු කාර්තුව තුළ බලාපොරොත්තු වන මෙරට ආදායම සපුරා ගැනීමට පවතින තත්වය තුළ නොහැකි බව රජය ඔවුන්ට දැනුම් දුන් බවත් හෙතෙම පැවසීය.
එම ආදායම සපුරා ගැනීම සදහා අයකරන බදු ප්‍රමාණය ඉහළ දැමිය යුතුබව ජාත්‍යන්තර මූල්‍ය අරමුදලේ නියෝජිතයන් පවසා ඇතත් ජනතාව මේවන විට අසීමිත බදු ප්‍රමාණයක් ගෙවන බැවින් තවදුරටත් බදු වැඩිකර නොහැකි බව රජය එම නියෝජිතයන්ට දැන්වූ බවත් අමාත්‍යවරයා කීය.
ඒ අනුව දෙවන ණය වාරිකය පිළිබඳව තවදුරටත් සාකච්ඡා කිරීමේ අරමුණින් එම නියෝජිතයන් කණ්ඩායම දිවයිනට පැමිණෙන බව අමාත්‍යවරයා වැඩිදුරටත් කියා සිටියේය.
සුමන උදයන්ත
