රජයට බදු නොගෙවීම සම්බන්ධයෙන් සමාජ මාධ්‍ය ක්‍රියාකාරිනී පියුමි හංසමාලි සහ අවුරා ලංකා සමාගමේ සභාපති ටී.ඒ.සී.වී. තාඹුගලට එරෙහිව කොළඹ මහාධිකරණය හමුවේ අධිචෝදනා ගොනු කිරීමට දේශීය ආදායම් දෙපාර්තමේන්තුව සූදානම් වන බව ඊයේ (ජූලි 31) අධිකරණයට දැනුම් දුන්නා.
දේශීය ආදායම් කොමසාරිස්වරයා වෙනුවෙන් පෙනී සිටි ජ්‍යෙෂ්ඨ නීතිඥ දිනේෂ් පෙරේරා කොළඹ අතිරේක මහෙස්ත්‍රාත් පසාන් අමරසේන හමුවේ පැවසුවේ, එම දෙදෙනාට එරෙහි විමර්ශන වාර්තා නීතිපතිවරයා වෙත යොමු කර ඇති බවයි.
පියුමි හංසමාලිට එරෙහි චෝදනා:
- 2022 සහ 2023 වසරවලට අදාළව පුද්ගල ආදායම් බදු වශයෙන් රුපියල් මිලියන 194ක් ගෙවීම පැහැර හැරීම.
- ‘ලොලියා’ නමැති සමාගමක් පවත්වාගෙන යමින්, ඒ සඳහා ආදායම් බදු වශයෙන් රුපියල් මිලියන 95ක් ගෙවීම පැහැර හැරීම.
තාඹුගලට එරෙහි චෝදනා:
- 2022 සහ 2023 වසරවලට අදාළව පුද්ගල ආදායම් බද්ද, අතිරේක බද්ද, දඩ සහ පොලිය සමඟ රුපියල් මිලියන 194ක් ගෙවීම පැහැර හැරීම.
නීතිඥවරයා අධිකරණයට වැඩිදුරටත් කියා සිටියේ, මෙම සැකකරුවන් දෙදෙනා රජයට හිමි විය යුතු බදු නොගෙවීමෙන් ‘සාවද්‍ය පරිහරණය’ යන වරද සිදුකර ඇති බවයි. 2017 දේශීය ආදායම් පනතේ 186, 189, සහ 190 වගන්ති යටතේ මෙම විමර්ශන සිදු කර තිබෙනවා.
